En novembro do 2005 a UNESCO fallaba a 3ª proclamación das Obras Mestras do Patrimonio Inmaterial e anunciaba que esta sería a última proclamación rexida por tal procedemento.
A partir da ratificación por parte dos Estados da Convención para a Salvagarda do Patrimonio Inmaterial, aprobada pola Unesco en outubro de 2003, esta norma ratificada por un mínimo de 30 estados entrou en vigor en 2006.
A Convención integra as proclamacións xa realizadas nunha Lista Representativa do Patrimonio Inmaterial e implanta outra segunda Lista para os patrimonios en grave risco de desaparición.
Un Comité Intergobernamental impulsou o desenvolvemento do novo procedemento que establece a Convención e en varias reunións fixouse a normativa que vai rexir a inscrición nas dúas listas indicativas anteriormente referidas.
Na última reunión celebrada neste mes de setembro en Tokío, acordouse tamén o calendario destas inscricións e o formato de presentación das propostas a inscribir tanto na Lista Indicativa como na Lista do Patrimonio Inmaterial precisado dunha salvagarda urxente.
O novo procedemento establece que os Estados poderán inscribir anualmente un ben do seu patrimonio inmaterial e a maiores poderán inscribir outras manifestacións de carácter multinacional.
A diferencia esencial co anterior procedemento é que son agora os Estados os que inscriben directamente na Lista Indicativa, axustándose aos criterios establecidos, os bens do seu patrimonio inmaterial.
Segundo as informacións que foron feitas públicas pola Unesco e que foron recollidas pola prensa internacional, o Comité para protección do Patrimonio Cultural Inmaterial aprobou que o período de presentación de candidaturas finalizará en agosto de 2008 e as primeiras inscricións nas Listas serán proclamadas en 2009.

A Candidatura das Tradicións Orais Galego-Portuguesas que foi presentada para a 3ª proclamación por Portugal e España, ten agora unha nova oportunidade nesta próxima convocatoria.
Nos informes elaborados pola Unesco para a súa avaliación manifestábase:
" O profundo espírito de diálogo que respira esta Candidatura e o desexo de reforzar e mesmo establecer a comunicación a través das fronteiras fai que esta candidatura sexa particularmente valiosa ".
"...a diversidade recollida no expediente é a proba da grande variedade das manifestacións culturais tidas en consideración..."

O informe concluía:
" ... recomenda que este expediente sexa redeseñado con miras a unha posterior proclamación. Gustaríanos facer fincapé no profundo interese patrimonial das tradicións presentadas por esta Candidatura, as cales cumpren cos criterios requeridos pola Unesco..."

Do mesmo xeito, o Xefe da Sección do Patrimonio Inmaterial da Unesco, Rieks Smeets, en xaneiro de 2006 enviou unha comunicación ás Delegacións Permanentes de Portugal e España na Unesco onde se lles suxire que unha vez teñan ratificado a nova Convención, " poderán voltar a presentar o expediente da Candidatura co mesmo contido unha vez feitas as correccións necesarias ".
Tanto España como Portugal xa ratificaron a mencionada Convención para a Salvagarda do Patrimonio Cultural Inmaterial. ( Portugal está pendente de ratificala na Assembleia da República ). Por todo exposto, desde a Asociación Cultural e Pedagóxica Ponte...nas ondas! cremos que voltamos a estar diante dunha nova oportunidade de conseguir que o patrimonio inmaterial galego-portugués sexa inscrito no lugar que merece, é dicir, na Lista Representativa do Patrimonio Inmaterial Mundial.
Cremos que o inxente traballo realizado para esta Candidatura é un valor que debe ser aproveitado e que as correccións precisas que a Unesco recomendaba son facilmente realizables.
Trátase agora de solicitar do goberno de Lisboa que confirme novamente a súa disposición a inscribir na Lista Indicativa da Unesco esta proposta, dentro do prazo que agora se abre. O acompañamento do goberno español tamén volve a ser necesario. Lembramos que existe un acordo unánime do Parlamento español apoiando a proclamación desta Candidatura, ademais doutros apoios do Parlamento Europeo e de persoas como Federico Mayor Zaragoza ou José Saramago entre outras personalidades do mundo da cultura.
O presidente da Xunta de Galicia manifestou o 8 de marzo de 2006 no Parlamento de Galicia a súa intención de impulsar novamente a Candidatura
Desde Ponte...nas ondas! agardamos que se dean os pasos necesarios para acadar este obxectivo coa maior dilixencia e coa maior urxencia.